जेंव्हा तू मिटत असतेस
तुझी एक एक पाकळी
तेंव्हा कासाविस होतात
तुझ्या मधुकंदावर पोसणारे
सारेच ....!!
त्यांना जाणीव नसते
जेंव्हा तू उमलत असतेस
उमलताना तुला अपेक्षीत
असणा-या तुषारांची ....!!
तुझे उमलणे ,
तुझ्यासाठी नसतेच कधी
तुझा जरी तो उत्सव असतो …
त्यांच्या साठी मात्र असते जत्रा …!!
म्हणूनच तुझी एक एक पाकळी
मिटते , कधी खुडते संसारी व्यवस्था !
तेंव्हा तुझ्या मिटतानाच्या
वेदनाही कळत नाहीत त्यांना ....!!
वाटतात ही तुझी सारी थेरं
नकोसेपण त्यांच्या असण्याचा
आणि तुझी नकोशी मलूल काया
देठापासून वेगळी पडत जाते …!!
खरंतर …
अशी एक एक पाकळी
मिटत असतांना
तुला ओंजळीत झेलून
पुन्हा उमलायला
काय लागतं .... ?
थोड़ी मुलायम माया
घट्ट आधाराने
लपेटलेल्या दुपटयासारखी …!!!
" समिधा "
कोणत्याही टिप्पण्या नाहीत:
टिप्पणी पोस्ट करा